WHOৰ পৰা আঁতৰি অহাৰ কথা ঘোষণা আমেৰিকাৰ; ট্ৰাম্পে দোহাৰিলে চীনৰ নিয়ন্ত্ৰণৰ কথা

কৰ’নাৰ দ্বাৰা বিশ্বৰ আটাইতকৈ অধিক ক্ষতিগ্ৰস্ত আমেৰিকাই বিশ্ব স্বাস্থ্য সংস্থাৰ পৰা আঁতৰি অহাৰ কথা ঘোষণা কৰিছে।

আমেৰিকাৰ ৰাষ্ট্ৰপতি ডোনাল্ড ট্ৰাম্পে কয় যে WHOসম্পূৰ্ণৰূপে চীনৰ নিয়ন্ত্ৰণত আছে। সংস্থাটোৱে পৰিৱৰ্তনৰ প্ৰক্ৰিয়া আৰম্ভ কৰাত ব্যৰ্থ হৈছে আৰু আমেৰিকাই বিশ্ব স্বাস্থ্য সংস্থাৰ সৈতে নিজৰ সম্পৰ্ক সমাপ্ত কৰিব।

ট্ৰাম্পে কয় যে এবছৰত ৪০ মিলিয়ন ডলাৰ দিয়েই চীনে WHOক নিয়ন্ত্ৰণত ৰাখিছে য’ত আমেৰিকাই এবছৰ ৪৫০ মিলিয়ন ডলাৰ অনুদান আগবঢ়াই আহিছে।

বিশ্ব স্বাস্থ্য সংস্থাটোক সংশোধনৰ বাবে যি পৰামৰ্শ দিয়া হৈছিল সেয়া কাৰ্যকৰী নকৰাৰ বাবে আমেৰিকাই WHOৰ সৈতে নিজৰ সম্পৰ্ক বিচ্ছিন্ন কৰিবলৈ লৈছে।

উল্লেখযোগ্য যে শেহতীয়াকৈ আমেৰিকাই WHOক আগবঢ়োৱা তেওঁলোকৰ সাহায্যৰ ধন ৰাশি বন্ধ কৰি দিছিল।

ৰাষ্ট্ৰপতি ডোনাল্ড ট্ৰাম্পে কৰ’না ভাইৰাছ চিনাক্তকৰণত WHO ব্যৰ্থ হোৱাৰ  অভিযোগ অনাৰ লগতে চীনক সহযোগিতা কৰা বুলি সমালোচনা কৰিছিল।

ইয়াৰ পূৰ্বে কৰ’না মহামাৰী ৰোধ কৰাৰ বাবে তথা পৰিস্থিতি নিয়ন্ত্ৰণত ব্যৰ্থ হোৱাৰ অভিযোগৰ মাজতে বিশ্ব স্বাস্থ্য সংস্থাটোৱে এটা নতুন ফাউণ্ডেশ্যনৰ কথা ঘোষণা কৰিছে।

এই ফাউণ্ডেশ্যনৰ জৰিয়তে কোনো মহামাৰীৰ পৰা পৰিত্ৰাণৰ বাবে পুঁজি গোটোৱা হ’ব য’ত কেবল বৃহৎ দেশসমূহৰ পৰাই নহয়, লগতে সাধাৰণ নাগৰিকৰ পৰাও সাহায্য গ্ৰহণ কৰা হ’ব।

বিগত দিনত WHOৰ ফালৰ পৰা প্ৰকাশ কৰা হৈছিল যে ইয়াৰ বৰ্তমান বাজেট ২.৩ বিলয়ন ডলাৰ যিটো এটা আন্তৰ্জাতিক সংস্থাৰ বাবে বহুত কম। তদুপৰি, আমেৰিকাৰ অনুদান বন্ধ কৰা হৈছে, গতিকেই অধিক পুঁজিৰ প্ৰয়োজন হৈছে।

আনহাতে, কেবল আমেৰিকাই নহয় বৰঞ্চ তেওঁলোকৰ হেচাৰ পাছত আন কেইখনমান দেশেও WHOত পৰিৱৰ্তনৰ বাবে আহ্বান জনাইছিল।

অভিযোগ কৰা হৈছিল যে WHOই কৰ’না ভাইৰাছৰ বিষয়ে যোৱা ডিচেম্বৰ মাহতে জানিব পাৰিছিল যদিও তেওঁলোকে সেয়া বিশ্বক অৱগত কৰা নাছিল।

The post WHOৰ পৰা আঁতৰি অহাৰ কথা ঘোষণা আমেৰিকাৰ; ট্ৰাম্পে দোহাৰিলে চীনৰ নিয়ন্ত্ৰণৰ কথা appeared first on NORTHEAST NOW (Assamese).

from NORTHEAST NOW (Assamese) https://ift.tt/2Ak63LF
via IFTTT