তামুলপুৰত ৰাইজৰ দলৰ প্ৰাৰ্থী নগেন চন্দ্ৰ দাসৰ প্ৰচাৰ; অবড়ো সুৰক্ষা সমিতিৰ মুকলি সমৰ্থন!

৫৮ নম্বৰ তামুলপুৰ বিধানসভা সমষ্টিত অন্যান্য ৰাজনৈতিক দলৰ লগতে ৰাইজৰ দলৰ প্ৰাৰ্থী নগেন চন্দ্ৰ দাসেও নিজৰ নিৰ্বাচনী  প্ৰচাৰ তীব্ৰতৰ কৰি তুলিছে।

নিজৰ সমৰ্থকক লগত লৈ গাঁৱে গাঁৱে গৈ, ঘৰে ঘৰে গৈ প্ৰচাৰ অব্যাহত ৰাখিছে ৰাইজৰ দলৰ প্ৰাৰ্থী নগেন চন্দ্ৰ দাসে।

তামুলপুৰত ৰাইজৰ দলৰ প্ৰাৰ্থী গৰাকীৰ সমৰ্থনত মুকলিকৈ ওলাই আহিছে অবড়ো সুৰক্ষা সমিতিৰ সাধাৰণ সম্পাদক যোগেশ্বৰ কলিতা আৰু তেওঁৰ সহকৰ্মী সকল।

ইয়াৰ মাজতে ৰাইজৰ দলৰ প্ৰাৰ্থী নগেন চন্দ্ৰ দাসে কয়, ‘’কৃষক নেতা অখিল গগৈক চৰকাৰে কাৰাৰুদ্ধ কৰি ৰাখিছে। অখিল গগৈৰ যি নীতি আদৰ্শ তাৰ প্ৰতি সন্মান জনাই এইবাৰ তামুলপুৰ সমষ্টিত ৰাইজে মোক ভোটদান কৰিব।‘’

তেওঁ লগতে কয়, ‘’মোৰ প্ৰতিদ্বন্দ্বী হিচাপে এইবাৰ তামুলপুৰত কোনো প্ৰাৰ্থী নাই আৰু মোৰ জয় সুনিশ্চিত। অসম জাতীয় পৰিষদ আৰু ৰাইজৰ দলৰ মাজত বুজাবুজি আছে। গতিকে অসম জাতীয় পৰিষদৰ সমৰ্থনো মই লাভ কৰিছো।‘’

আনহাতে, তেওঁ বিজয়ী হ’লে কৃষক ৰাইজৰ হৈ কাম কৰিব আৰু কৃষকৰ উৎপাদিত সামগ্ৰীৰ উচিত মূল্য দিয়াৰ বাবে ব্যৱস্থা কৰিব বুলি প্ৰতিশ্ৰুতি দিয়ে।

ইপিনে ৰাইজৰ দলৰ প্ৰাৰ্থী গৰাকীৰ সমৰ্থনত মুকলিকৈ ওলাই আহিছে অবড়ো সুৰক্ষা সমিতিৰ সাধাৰণ সম্পাদক যোগেশ্বৰ কলিতা।

কলিতাই কয় যে অজনাজাতি অধ্যুষিত তামুলপুৰ বিধানসভা সমষ্টিত কোনো এটা ৰাজনৈতিক দলেই অজনজাতীয় লোকক প্ৰাৰ্থীত্ব দিয়া নাই।

অজনাজাতীয় লোকৰ ভৱিষ্যত প্ৰজন্মৰ ৰাজনৈতিক জীৱন সুৰক্ষিত কৰাৰ স্বাৰ্থতেই তামুলপুৰ সমষ্টিৰ ৰাইজৰ দলৰ প্ৰাৰ্থী গৰাকীৰ হৈ ওলাই আহিছো  অবড়ো সুৰক্ষা সমিতি।

ৰাইজে এইবাৰ নগেন চন্দ্ৰ দাসক ভোটদান কৰিব বুলি উল্লেখ কৰি কলিতাই কয় যে এচাম বিক্ৰী যোৱা অজনজাতীয় লোকে যি সকলে সমষ্টিৰ চাৰিসীমা চিনি নাপায়, তেওঁলোকে নিজৰ স্বাৰ্থৰ বাবে প্ৰাৰ্থীত্ব আগবঢ়াইছে।

তামুলপুৰ সমষ্টিটো যাতে ভৱিষ্যতে অজনজাতিৰ বাবে সুৰক্ষিত হৈ থাকে তাৰ বাবে ভোটাৰ ৰাইজে ৰাইজৰ দলৰ প্ৰাৰ্থী নগেন চন্দ্ৰ দাসক ভোট দিব লাগে বুলিও আহ্বান জনায় অবড়ো সুৰক্ষা সমিতিৰ নেতা যোগেশ্বৰ কলিতাই।

The post তামুলপুৰত ৰাইজৰ দলৰ প্ৰাৰ্থী নগেন চন্দ্ৰ দাসৰ প্ৰচাৰ; অবড়ো সুৰক্ষা সমিতিৰ মুকলি সমৰ্থন! appeared first on NORTHEAST NOW (Assamese).

from NORTHEAST NOW (Assamese) https://ift.tt/3fkHTTV
via IFTTT