সেউজ বিশ্বনাথে ৰূপম দাস আৰু যদু নন্দন দাসক জনালে সম্বৰ্ধনা

বিভিন্ন সামাজিক দায়বদ্ধতাৰে গুপ্তকাশী বিশ্বনাথ ঘাটৰ সৰ্বাংগীন উন্নয়নমূলক পৰিকল্পনাৰ লগতে গুপ্তকাশী বিশ্বনাথ ঘাটক এক নতুন মাত্ৰা প্ৰদান কৰা অৰ্থে চলিত বৰ্ষত কেইগৰাকী মান নৱ প্ৰজন্মৰ যুৱক-যুৱতীৰ নেতৃত্বত গঢ় লৈ উঠিছিল সেউজ বিশ্বনাথ নামৰ এক সামাজিক অনুষ্ঠান।

নতুনকৈ গঢ় লৈ উঠা সেউজ বিশ্বনাথৰ উদ্যোগত গুপ্তকাশী বিশ্বনাথ ঘাটত এক সম্বৰ্ধনা অনুষ্ঠান অনুষ্ঠিত কৰা হয়।

ইতিমধ্যে গুপ্তকাশী বিশ্বনাথ ঘাটৰ পৰা ৰূপম দাসে বহু ঘাত প্ৰতিঘাটৰ মাজেৰে সদৌ অসম ছাত্ৰ সন্থাৰ এগৰাকী সক্ৰিয় সেনানী হৈ দুলিয়াজান অধিবেশনত সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক সদস্য হিচাপে আসন অলংকৃত কৰি গৌৰৱ কঢ়িয়াই আনিছে।

লগতে বিশ্বনাথ ঘাটৰ পুৰণি গাঁৱৰ যদু নন্দন দাসে চিকিৎসা বিজ্ঞান বিষয়ত অধ্যয়ন কৰাৰ বাবে ডিব্ৰুগড় মেডিকেল কলেজত ইতিমধ্যে আসন লাভ কৰি সমগ্ৰ অঞ্চলটোত এক শুভ বাৰ্তা কঢ়িয়াই আনিবলৈ সক্ষম হৈছে।

এই বিশেষ সভাৰ আৰম্ভণিতে অসমৰ প্ৰয়াত প্ৰাক্তন মুখ্য মন্ত্ৰী তৰুণ গগৈৰ আত্মাৰ সদগতিৰ বাবে এক মিনিট সময় মৌন প্ৰাৰ্থনা কৰা হয়।

সেউজ বিশ্বনাথৰ উদ্যোগত অনুষ্ঠিত হোৱা এই সম্বৰ্ধনা অনুষ্ঠানটিত আঁত ধৰে সেউজ বিশ্বনাথৰ সভাপতি কাজি জেইদুল ইছলামে আৰু সভাৰ সভাপতিত্ব কৰে মনোজ বৰুৱাই।

মনোজ বৰুৱাৰ সভাপতিত্বত অনুষ্ঠিত হোৱা এই সম্বৰ্ধনা অনুষ্ঠানটিত ৰূপম দাস আৰু যদু নন্দন দাসক সম্বৰ্ধনা জ্ঞাপন কৰা হয়।

ৰূপম দাসক এখন ফুলাম গামোচা আৰু এখন সম্বৰ্ধনা পত্ৰৰে আৰু যদু নন্দন দাসক ফুলাম গামোচা আৰু এটি উপহাৰৰে সম্বৰ্ধনা জনোৱা হয়।

ইফালে উক্ত অনুষ্ঠানতে স্থানীয় ৰামধেনু বিহুৱা দলৰ তৰফৰ পৰাও দুয়োগৰাকী ব্যক্তিক ফুলাম গামোচাৰে সম্বৰ্ধিত কৰে।

এই অনুষ্ঠানত উপস্থিত থাকে বিশ্বনাথ ঘাটৰ স্থানীয় ইন্দ্ৰজিৎ কোচ, নৱ জ্যোতি দাস,  চিদানন্দ দাস, পৰাগ চৌধুৰীৰ লগতে সেউজ  বিশ্বনাথৰ সম্পাদিকা শিল্পী মনি দাস সহ বিদ্যুত দাস, পিংকুল হাজৰিকা, পৰশ মণি বৰঠাকুৰ, স্নিগ্ধা বৰকটকী আৰু অঞ্চলটোৰ বহু কেইগৰাকী স্থানীয় ব্যক্তি।

The post সেউজ বিশ্বনাথে ৰূপম দাস আৰু যদু নন্দন দাসক জনালে সম্বৰ্ধনা appeared first on NORTHEAST NOW (Assamese).

from NORTHEAST NOW (Assamese) https://ift.tt/2V0s4q0
via IFTTT