১ নৱেম্বৰৰ পৰিৱৰ্তে ৬ নৱেম্বৰৰ পৰাহে পৰ্যটকৰ বাবে মুকলি হ’ব ওৰাং ৰাষ্ট্ৰীয় উদ্যান

অহা ১ নৱেম্বৰৰ পৰা ৰাজীৱ গান্ধী ওৰাং ৰাষ্ট্ৰীয় উদ্যান আৰু ব্যঘ্ৰ সংৰক্ষিত বনাঞ্চলখন পৰ্যটকৰ বাবে পুনৰ মুকলি কৰাৰ কথা আছিল যদিও কিছু অসুবিধাৰ বাবে কৰ্তৃপক্ষই তাৰিখৰ কিছু সাল সলনি ঘটাইছে।

এতিয়া পৰ্যটকৰ বাবে ৰাষ্ট্ৰীয় উদ্যানখন ১ নৱেম্বৰৰ পৰিৱৰ্তে ৬ নৱেম্বৰৰ পৰাহে মুকলি কৰি দিয়া হ’ব।

বুধবাৰে বন বিভাগে জিলা তথ্য আৰু জনসংযোগ বিষয়াৰ কাৰ্যালয়লৈ এক বিজ্ঞপ্তি প্ৰেৰণ কৰি এই কথা জানিবলৈ দিয়ে।

বিজ্ঞপ্তিটো অনুসৰি যোৱা কিছুদিন ধৰি হোৱা নেৰানেপেৰা বৰষুণৰ ফলত ৰাষ্ট্ৰীয় উদ্যানখনৰ ৰাষ্টা-ঘাট বেয়াকৈ ক্ষতিগ্ৰস্ত হৈছে আৰু এইবোৰ পথ মেৰামতি কৰিহে পৰ্যটকৰ বাবে মুকলি কৰি দিয়া হ’ব।

উল্লেখ্য যে ক’ভিড সংক্ৰমণৰ বাবে ঘোষণা কৰা ৰাষ্ট্ৰজোৰা ল’কডাউনৰ পৰিপ্ৰেক্ষিতত চলিত বৰ্ষৰ মাৰ্চ মাহৰ পৰা ওৰাং ৰাষ্ট্ৰীয় উদ্যান বন্ধ হৈ আছিল।

২০১৮ বৰ্ষৰ জৰীপ অনুসৰি, মিনি কাজিৰঙা ৰূপে পৰিচিত ওৰাং ৰাষ্ট্ৰীয় উদ্যানত বৰ্তমান সময়ত ১০০ ৰো অধিক এশিঙিয়া গঁড় থকাৰ উপৰি ২১ টা ৰয়েল বেংগল বাঘ আছে।

৭৯ বৰ্গকিলোমিটাৰ অঞ্চলজুৰি বিয়পি থকা ওৰাং ৰাষ্ট্ৰীয় উদ্যান বনৰীয়া হাতী, বনৰীয়া মহ, বন হৰিণ, বন গাহৰিকে ধৰি ভালেসংখ্যক বনৰীয়া জীৱ-জন্তুৰ বাসস্থান।

উল্লেখযোগ্য যে, পৰ্যটকৰ বাবে ৰাষ্ট্ৰীয় উদ্যানখন মুকলি কৰিলেও পৰ্যটক সকলে ৰাষ্ট্ৰীয় উদ্যানখন দৰ্শনৰ সময়ত ক’ভিড প্ৰ’টকল মানি চলিব লাগিব।

ইয়াৰ পূৰ্বে মানস ৰাষ্ট্ৰীয় উদ্যানৰ লগতে কাজিৰঙা ৰাষ্ট্ৰীয় উদ্যানো পৰ্যটকৰ বাবে মুকলি কৰি দিয়া হৈছিল।

The post ১ নৱেম্বৰৰ পৰিৱৰ্তে ৬ নৱেম্বৰৰ পৰাহে পৰ্যটকৰ বাবে মুকলি হ’ব ওৰাং ৰাষ্ট্ৰীয় উদ্যান appeared first on NORTHEAST NOW (Assamese).

from NORTHEAST NOW (Assamese) https://ift.tt/3jFiZN0
via IFTTT