অৰুণাচলৰ চাংলাঙত আটক আলফা( স্বাঃ)ৰ কেডাৰ : মাৰাণাস্ত্ৰ উদ্ধাৰ

ক’ৰ’নাৰ বিৰুদ্ধে এখন যুদ্ধ চলি থকাৰ সমান্তৰালকৈ উগ্ৰপন্থী বিৰোধী অভিযানো অব্যাহাত আছে।

কালি পুৱা অসমৰ তিনিচুকীয়া জিলাৰ মাৰ্ঘেৰিটা মহকুমাৰ চুবুৰীয়া ৰাজ্য অৰুণাচল প্ৰদেশৰ চাংলাং জিলাত পুনৰ ভাৰতীয় সেনাৰ হাতত আটক হ’ব লগা হ’ল চাৰিজন আলফা স্বাধীনৰ কেডাৰ।

উল্লেখ্য যে দিনজান সেনা ডিভিজনৰ চোৰাংচোৱাৰ খবৰৰ ভিত্তিত আছাম ৰাইফলছৰ ৬ আৰু ৯নং বেটেলিয়নে আলফা স্বাধীনৰ বিৰুদ্ধে চলোৱা যুটীয়া অভিযানত ম্যানমাৰৰ শিবিৰৰ পৰা পলাই অহা চাৰি দুৰ্ধৰ্ষ আলফা স্বাধীনৰ সদস্যক কালি পুৱা ৬.৩০ বজাত অস্ত্ৰসহ আটক কৰে।

ভাৰত-ম্যানমাৰ সীমান্ত চকী পাৰ হওঁতেই অটব্য অৰণ্যৰ মাজত ভাৰতীয় সেনাৰ অভিযানকাৰী দলৰ হাতত আটক হোৱা আলফা স্বাধীনৰ সদস্যকেইজন হৈছে তিনিচুকীয়া জিলাৰ পেঙেৰী আৰক্ষী থানাৰ অন্তৰ্গত কঁ‌ঠালগুৰি গাঁও নিৱাসী ছাৰ্জেণ্ট মেজৰ টিখেশ্বৰ মৰাণ ওৰফে অৰ্জুন অসম, লখিমপুৰ জিলাৰ ঢকুৱাখনা আৰক্ষী থানাৰ অন্তৰ্গত কাঠাবাৰী গাঁও নিৱাসী ছাৰ্জেণ্ট অৰূপ দুৱৰা ওৰফে আঞ্চন অসম, তিনিচুকীয়া জিলাৰ মাৰ্ঘেৰিটা আৰক্ষী থানাৰ অন্তৰ্গত খামান পথাৰ গাঁও নিৱাসী ছাৰ্জেণ্ট সুৰজিত দুৱৰা ওৰফে খামান অসম আৰু তিনিচুকীয়া জিলাৰ পেঙেৰী আৰক্ষী থানাৰ অন্তৰ্গত টেকেৰী গাঁও নিৱাসী ছাৰ্জেণ্ট জিন্তু অসম।

ধৃত আলফা সদস্যকেইজনৰ জিম্মাৰ পৰা দুটা আমেৰিকাত নিৰ্মিত পিষ্টল আৰু এটা চীনত নিৰ্মিত পিষ্টলসহ কেইবাটাও মেগজিন, সজীৱ গুলী আৰু ম’বাইল ফোন উদ্ধাৰ কৰে।

ভাৰতীয় সেনাই ধৃত আলফা কেডাৰকেইজনক চাংলাং জিলাৰ লাজু থানাত চমজাই দিছে বুলি সেনাৰ সূত্ৰত প্ৰকাশ।

শেহতীয়াকৈ বহু কেইজন আলফা স্বাধীনৰ কেডাৰ ভাৰতীয় সেনাৰ হাতত আটক হ’ব লোৱাত আলফা স্বাধীনৰ ভেটিত কিছু পৰিমাণে ক্ষতি হৈছে বুলি সূত্ৰত প্ৰকাশ।

অন্যহাত এক সূত্ৰৰ পৰা পোৱা তথ্য অনুসৰি অলাফা স্বাধীনৰ কেম্পত উপস্থিত হোৱাৰ পাছত সমগ্ৰ পৰিবেশৰ লগত একাত্ম তথা কঠোৰ অনুশাসনৰ বাবে প্ৰস্তত হ’ব নোৱাৰি পলায়ন কৰি ম্যনমাৰ সীমান্ত পাৰ হোৱাৰ সময়ত ভাৰতীয় সেনাই আটক কৰে।

একাংশই কেৱল কেইদিন মানৰ বাবে আলফা স্বাধীনৰ কেম্পত নিজৰ নাম অন্তৰ্ভুক্ত কৰি কেম্পৰ অস্ত্ৰ-শস্ত্ৰলৈ পলায়ন কৰি আহি ভাৰতীয় সেনাৰ ওচৰত আত্মসমৰ্পণ কৰি ছালফা বা আত্মসমৰ্পণকাৰী আলফাৰ লেবেল লগাই সেনাৰ চোৰাং চোৱা, দাবী ধমকিৰে ঠিকা-থুকুলি বা অন্য অসামাজিক কৰ্মত লিপ্ত হৈ আহিছে বুলি একেটা সূত্ৰতে প্ৰকাশ।

The post অৰুণাচলৰ চাংলাঙত আটক আলফা( স্বাঃ)ৰ কেডাৰ : মাৰাণাস্ত্ৰ উদ্ধাৰ appeared first on NORTHEAST NOW (Assamese).

from NORTHEAST NOW (Assamese) https://ift.tt/2BFtfou
via IFTTT