ভাৰতীয় গৱেষকৰ দাবী; শৌচালয়ৰ পৰা কৰ’না বিয়পাৰ আশংকা অধিক

শৌচালয়সমূহত সাধাৰণতে বীজাণুৱে বাহ সাজে। ইয়াৰ পৰাই কৰ’না ভাইৰাছৰ সংক্ৰমণৰ আশংকা বেছি।

‘ফ্জিক্স অফ ফ্লুইড’ নামৰ জাৰ্ণেলত প্ৰকাশিত এক গৱেষণা পত্ৰত আমেৰিকাৰ ফ্ল’ৰিডা আটলান্টিক বিশ্ববিদ্যালয়ৰ গৱেষক সিদ্ধাৰ্থ বাৰ্মাই এনে দাবী কৰিছে।

ভাৰতীয় গৱেষক সিদ্ধাৰ্থ বাৰ্মাই আমেৰিকাৰ সাধাৰণ লোকৰ ব্যৱহাৰযোগ্য কিছু শৌচালয়ক লৈ কাম কৰিছে। তাতেই তেওঁ এই তথ্য আৱিষ্কাৰ কৰে।

শৌচালয়বোৰত লাভ কৰা পৰিৱেশৰ বাবেই ইয়াৰ ভিতৰত বীজাণুৰ উপস্থিতি অধিক। বুটাম টিপি পানী মৰা বা ফ্ল্যাছ কৰাৰ সময়ত শৌচালয়সমূহৰ বিতৰত ভাসমান জল কণিকাৰ পৰিমান ব্যাপক হাৰত বৃদ্ধি পায়। এই জল কণিকাক আশ্ৰয় কৰিয়েই অতি সহজে কৰ’না ভাইৰাছৰ দৰে বীজাণু বিয়পি পৰে।

সিদ্ধাৰ্থই জানিবলৈ দিয়া মতে ৩ঘন্টা ধৰি প্ৰায় ১০০ বাৰ বুটাম টিপি পানী মৰাৰ সময়ত শৌচালয়সমূহৰ বতাহ পৰীক্ষা কৰা হৈছিল।

দেখা গৈছে যে ফ্ল্যাছ মৰাৰ লগে লগে বতাহত বীজাণুৰ পৰিমাণ বাঢ়ি গৈছে। সেয়াই নহয়, বীজাণুসমূহ প্ৰায় ৫ ফুট উচ্চতালৈকে উঠি গৈ তাত ২০ ছেকেণ্ড ধৰি ভাহি ৰৈছে।

এনে তথ্যৰ আঁত ধৰিয়েই বহতেই দাবী কৰে যে ভাৰতৰ দৰে দেশসমূহত কৰ’না বিয়পাৰ আঁৰত সাধাৰণ লোকে ব্যৱহাৰ কৰা এনে শৌচালয়সমূহৰ ডাঙৰ ভূমিকা আছে।

সিদ্ধাৰ্থ বাৰ্মাই লগতে দাবী কৰে যে সাধাৰণ শৌচালয়ৰ দৰেই যিবোৰ শৌচালয়ত কেবল পুৰুষসকলৰ মূত্ৰত্যাগৰ ব্যস্থা থাকে সেইবোৰৰ বতাহতো ৩ মাইক্ৰ’মিটাৰতকৈয়ো ক্ষুদ্ৰ আকাৰৰ জল কণিকা ভাহি ফুৰে।

এইসমূহৰ আকাৰ ইমানেই ক্ষুদ্ৰ যে ই সহজেই বহুসময় ভাহি থাকিব পাৰে। ইয়াৰ ফলত কৰ’নাকে ধৰি সকলোধৰণৰ বীজাণুৱে বিয়পি পৰা আশংকা বহুখিনি বৃদ্ধি পায়।

গৱেষণাত কোৱা হৈছে যে পশ্চিমীয়া আৰ্হিৰ শৌচালয়সমূহ ব্যৱহাৰ কৰাৰ পাছত ঢাকনিখন বন্ধ কৰি বুটাম টিপি পানী মাৰিলে ভাহি উঠিব পৰা জল কণিকাৰ পৰিমান তুলনামূলকভাৱে হ্ৰাস পায়। ফলত বীজাণু কম বিয়পিব।

কিন্তু এইটোও বৰ সুৰক্ষিত নহয়। শৌচালয়সমূহত বতাহ চলাচলৰ মাত্ৰা বৃদ্ধি কৰি সংক্ৰমণৰ হাৰ হ্ৰাস কৰাটো সম্ভৱ হ’ব পাৰে।

The post ভাৰতীয় গৱেষকৰ দাবী; শৌচালয়ৰ পৰা কৰ’না বিয়পাৰ আশংকা অধিক appeared first on NORTHEAST NOW (Assamese).

from NORTHEAST NOW (Assamese) https://ift.tt/3gAVwia
via IFTTT