সুখৱৰ! ভূটানৰ প্ল্যান্টৰ পৰা অক্সিজেন লাভ কৰিব অসমে

সমগ্ৰ ভাৰতবৰ্ষত অতিমাৰী কৰোনাই  ভয়াবহ সংক্ৰমণৰ ৰূপ ধাৰণ কৰাৰ সময়ত দেশজুৰি অক্সিজেনৰ নাটনিৰ খৱৰে দেশ তথা অসমৰ জনসাধাৰণকো উদ্বিগ্ন আৰু শংকিত  কৰি তুলিছে।

কিন্তু ইয়াৰ মাজতে দেওবাৰে দেশবাসীৰ কাৰণে এক সুখৱৰ কঢ়িয়াই অনা পৰিলক্ষিত হৈছে। দেওবাৰে  দিনৰ ভাগত অসম চৰকাৰৰ স্বাস্থ্য, বিত্ত আৰু শিক্ষা মন্ত্ৰী ড° হিমন্ত বিশ্ব শৰ্মাৰ নিৰ্দেশ মৰ্মে ৰাজ্যিক স্বাস্থ্য মন্ত্ৰী পীষুষ হাজৰিকা আৰু ৰাজ্যসভাৰ সাংসদ বিশ্বজিৎ দৈমাৰীয়ে ইষ্টাৰ্ণ ভূটানৰ চামদ্ৰুপ ঝংখাৰত উপস্থিত হয়।

তেওঁলোকে যোৱা বৰ্ষত কোভিড মহামাৰীৰ সময়ত ভূটান ৰাষ্ট্ৰৰ চামদ্ৰুপ ঝংখাৰত নিৰ্মাণৰ কাম আৰম্ভ কৰা অক্সিজেন প্ল্যান্টটো পৰিদৰ্শন কৰি কামৰ অগ্ৰগতিৰ বুজ লয়।

উল্লেখযোগ্য যে যোৱা বছৰ লকডাউনৰ বাবে এই অক্সিজেন প্ল্যান্টটোৰ নিৰ্মাণৰ  কাম বন্ধ হৈ আছিল। প্ল্যান্টটো পৰিদৰ্শন কৰি মন্ত্ৰী পীষুষ হাজৰিকা আৰু ৰাজ্যসভাৰ সাংসদ বিশ্বজিৎ দৈমাৰীয়ে তামুলপুৰত উপস্থিত হৈ সংবাদ মাধ্যমৰ আগত কয় যে এই অক্সিজেন প্লান্টটো সম্পূৰ্ণ হৈ উঠিবলৈ আৰু প্ৰায় ৪০ দিন সময় লাগিব।

অক্সিজেন প্ল্যান্টটো সম্পূৰ্ণ হৈ উঠিলে প্ৰতি দিনে ৫০ মেট্ৰিক টন অক্সিজেন উৎপন্ন ‘হব আৰু তেতিয়া দেশত অক্সিজেনৰ অভাৱ বহুলাংশে লাঘৱ হব।

যি সময়ত মহামাৰী কৰোনাৰ ভয়াবহ সংক্ৰমণৰ সময়ত দেশজুৰি অক্সিজেনৰ যি নাটনিৰ খৱৰ, সেই খবৰে জনসাধাৰণক উদ্বিগ্ন কৰি তুলিছে, সেই সময়তে স্বাভাৱিকতে এনে খবৰে ৰাজ্যবাসীক কিছু আত্মসন্তুষ্টি  দিবলৈ সক্ষম হৈছে ৷

ইপিনে জনসাধাৰণক কৰ’নাৰ দ্বিতীয় লহৰত অতি বেছি সাৱধান হবলৈকে আহ্বান জনাই মন্ত্ৰী গৰাকীয়ে কয় যে বৰ্তমানৰ কৰ’না মাহামাৰীৰ বীজাণু গাঁৱৰ ভিতৰতো প্ৰৱেশ কৰিবলৈ আৰম্ভ কৰিছে ৷ সেয়ে সকলোৱে নিয়ম নীতি পালন কৰি অধিক সজাগতাৰ মাজেৰে দিনবোৰ পাৰ কৰিব লাগিব।

অৱশ্যে মন্ত্ৰী গৰাকীয়ে বৰ্তমান সময়ত ৰাইজ কিছু সাৱধান হোৱা বুলি উল্লেখ কৰি কয় যে স্বাস্থ্য বিভাগে টিকা যোগান ধৰি টীকাকৰণৰ ব্যৱস্থা কৰি আহিছে।

জনসাধাৰণক কিছু ধৈৰ্যৰে কৰোনা প্ৰতিৰোধী টিকাকৰণ লবলৈও আহ্বান জনায় ৷

ৰাজ্য চৰকাৰে বান্ধি দিয়া নীতি নিয়মসমূহ মানি চলি নিজকে এই কৰ’নাৰ পৰা বচাই ৰখাৰ লগতে নিজৰ পৰিয়াল আৰু সমজখনকো বচাই ৰাখিবলৈ প্ৰতি গৰাকী নাগৰিকক আহ্বান জনায় মন্ত্ৰী পীযুষ হাজৰিকা আৰু ৰাজ্যসভাৰ সাংসদ বিশ্বজিত দৈমাৰীয়ে।

The post সুখৱৰ! ভূটানৰ প্ল্যান্টৰ পৰা অক্সিজেন লাভ কৰিব অসমে appeared first on NORTHEAST NOW (Assamese).

from NORTHEAST NOW (Assamese) https://ift.tt/3sPpt0v
via IFTTT